2isti2néf L moudawwaneh

mounzou ékhir post 3aLa haL blog w la halla2 tghayyar 2ichya ktir, bass haL chi ma ra7 y7iddné 3aLa 140 character.

Ktir laziz wa7ad ykoun sikraan 3aLa chart maykoun inta. L akhawein L Ri7béné bi2ouLo 2inno L sikranine biL saa7at mitL L njoum bisamaL layL. Yi3neh 7aasLo bya3teh rawna2 L sikran. Kein fi zalameh sikran 2e3id biL bus wara 3am yi7keh houwweh w rfi2o, 7adiss 3an L chighL 2aw chi, yi3La sawto 2aw2eit ba3dein yintibih 3a 7aaLo w ykhaffif bass 7atman yirja3 yi3La sawto. 2iLa 2an wa22af L bus biL m7atta w tawwaL. Ma riji3 dighreh 2aLLa3 ba3d ma talla3 L rikkeib. Ma 7adan akhad waLa 3ata, akid kilna machghouline bi 3aaLamna L khass ma badna nit3aata ma3 7adan. L wa7id li fakkar yi7keh ma3 Chauffeur L Bus houwweh L sikran.

2aLLo L chauffeur inno ra7 yontour biL m7atta tis3 d2ayi2, w 2iza mista3jiL yekhoud L bus L 2iddemo. Tab3an ana ma smi3t L chauffeur chou 2aaL bass L sikran kein 3am bikhabbir rfi2o min 2awwaL L bus la 2ekhro, faL kiLL simi3 w nizLow 2akhado L bus li 2iddeimo.

Tab3an L kiLL 2iLLa 2ana, b2iit biL bus zéto, w lamma dawbalna 3an L bus L 2iddémna maddayt 2iidé mniL chibbeik w ba3ast rikkeib L Bus L téné. L 3ibra hiyyeh 2inno L waa7ad houwweh w sikran bifakkir 7aLo 3ab2areh 2iza 3imiL chi zakeh, bass hiyyeh chaghLé nisbiyyé. Min kitr L habaL sammo L satlé 7akim.

7arii2a, 7arii2a, 7arii2a

Dawwa fajr 2ams infijar saati3 talla samaa2a Toronto. Khirsit L balébiL 3ind hadiir L infijar. Min 2asaar L infijar L 2awwaliyyé ma2taL 2aktar min 1300 madané (baynetoun niswein) bi Georgia. W 2istich-héd L che3ir Ma7moud Darwish wa salaasa min mouraafikiih.
Wa bisabab L bouroudé L 7aasla biL intikhabet L amerikiyyé wa khoulouww hawa L CNN min 2ay 2a7dess sékhné, 2aam 3imlé L 2i3leim L ameriké bitaghtiyit L 7adass moubaacharatan, mimma 2adda 2ila mawjit istighraab bi soufouf L cha3b L 2ameriké. "What happened is terrible, we thought they lived in Igloos" sarra7 2a7ad L mas2oulinebi wileyit Ohio faddaL 3adam L kachf 3an 2ismo.
Wa bi2akhbaar L ta2s, ghe2im 2ila mouchmis jiz2iyyan, Toronto mittijha na7ou ra2m 2iyéssé bi tahaatouL L 2amtaar mimma 2assar 2ijeban 3aLa mawsam L bizzé2, youzkar 2inno L bizzé ken raaf3it L 2iktissad bi haL sayf yallé khayyaf L 2améL min 7ays tadahwour L boursa wiL tadakhoum.

W Gheir Hek, Machi

Faa eh... fata7 Gym jdid laL anorexic. Bitfout bitlé2é L sabaya 3am ya3mlo bicyclette biL ma2loub 2aw 3am yimcho Moonwalk 3aL Treadmill. W buisma3o moussi2a 3aLa naça2, ma ba3rif. Bass mich Count Basie.
W gheir hek? Machi!

Chi ma byitsadda2

Iza bkhabbirkoun chou saar ma3eh hadek L nhar, ma ra7 bitsad2o! fa ma ra7 khabbirkoun!

L 2ar2aam ma btikzoub

Fi 2ichya 3inda probabilité ktiir da2iilé 2inno to7saL, bass bto7saL nonetheless. Jim3t L maadyeh 7assaL ma3eh kaza chaghLé min haL 2abiiL: Ana w reji3 mniFransa matra7 maL 3élam byi7kouk min wara L 2zéz w btisma3loun sawtoun 3a speaker, w bittabi2 L tnénaw3ichriine 3a faw2a, fa 2ana w reji3 min hounik téné 2ayyem Bob day L moubaarak, bchouf 2ortit 7amém 3am bighotto 3aL taljeit, keno raff 3am yinzalo fa 2ilt 2inno barké iza ta2achtoun soura bibayno tayriine 2aw chi wi7deh tkoun ekhde pose titla3 fet7a jwéni7a biL soura, salbé. Wa lékin L soura tol3it 3aadiyyé jiddan, L mich 3aadé abadan houwwé 2inno ana w naatir L soura la tzahhir 3aL chéché btijeh 7amémé m2akhra 3an rif2éta w mchang7a biL hawa btidroub birassé hiyyé w 3am bit7awiL tghot! tab ma32ouL!? ma 3a 2assés bya3rfo ytiiro w ma byikhrmo w byotla3o vertical mitL L helicopter w full option byijo? Tab 3aaL bitsiir.

Nhar L ba3do kenit 3am titlouj nifnéf 2ana w reji3 3aL beit mniL jém3a, faaa L talj L néziL khafif, w 2ana bitabii3t L 7aaL mlaflaf w 3am bitnaffas min minkharé, chi tabii3eh bikiLL L 2a7wéL w lékin darouré bi hay L 2a7wéL L jawwiyyé. Tab 2inno chou? baddak titnaffas min timmak wiL hawa -20°C? akid la2, faa ana w 3am bitnacha2 L hawa L jaliidé min minkhaaré bichrou2 taljéyé zghiiré, yi3neh chou haL 2i7timééL inno tfout 7abbit talj bmonkhaaré! Mich hone L 2ossa L 2ossa 2inno L talj biL ekhir chou? ma houwwé mayy! yi3neh bala ma 2itsabba7 w baLa ma 2ighra2 w 3aLa bou3d chi 100km min 2a2rab chatt, w b3izz L chatwiyyé, w ma 3am bichrab minL brii2 w m3allé mitr foo2 mokhé, wala 7atta 3am makhmid min ba3d ma farché snéné! kill chi 3am ba3mLo houwwé 2inno 3am chi22 tarii2é wost L bayaad wiL zamhariir, w chou baddak ysiir ma3eh? Fét mayy bimnékhiiré! Ya salaam, tamém bardo bitsiir.

Ok, ba3d yawmein ana w reji3 mniL chighL w naatir L train, kén wé2if 7addé naatir zalamé khityaar, mich 2inno bitaa3 3ikkayzé w mka7ka7 2aw chi, la2 3aadé chéyib w khityar bass. Faa wé2fiine ana wiyyé naatrine zét L Train, w ana kint wé maylt L 2a2rab min matra7 ma L train jéyé w houwwé wé2if maylit L 2ab3ad, fa baramt dahré laL train bichakL 2inno Lamma byo2ta3 ma yijé L hawa biwijjeh , jarra2 zelik sirt 3ambittalla3 biL zalamé. wa 2izz, wa fii ma yazaaL L train ba3iidan masaafa la ba2s biha, byou2a3 saa7ibna biL 3ard mitL ma houwwé, byinli2i7 3a khasro, w wala 7iss wala 7arakeh wala chi! 2anja2 3imiL soot wa2t L wa2a3. Tab law ba3rif dissiLLo nabado yimkin kint 3milt chi, bass 2inno 2arrabt 3leh nitfeh jarrabt 2arrib daynté 3a wijjo ma smi3to 3amyitnaffas. W ballachit L 3aalam tjamhir w hek w ana nsa7abt. w bitabii3t L 7aaL bihaL 2asné2 wossiL L train fa 3arbacht. Wa lékin khayna héL 3ambisou2 L trén saar baddo yjamhir houwa L 2aakhar baddo ya3teh ti3liméto w ytammin L jamii3 2inno everything is under control, ma3 ma 7ada mpannac wala chi, L 3aadeh bass hek m7awmiine 7awLo ba3d chway 7a ychiiLo celluléraatoun w yekhdo souwar. w halla2 L trén wé2if wiL bweb mfatta7a saar badda haL 3aalam L biL train totla3 titfarraj, wlé khalsouna ba2a badna nrou7 3a byoutna khayyé!

Tanaa2oud

allak 3atouL zékir 2inno iza baddak tkoun manti2eh, mich darouré tista3miL L manti2 7asriyyan.

2iza jiit 2iltillak: "ana kill chi b2oulo kizb" w 2inta manti2é yaba, younéné! byotla3 ma3ak 2inno iza mazbout kill chi b2oulo kizb yi3neh hay L jimlé bitti7diid kizbé w haL chi byi3neh 2inno fi 2ichya b2oula mazbouta, w 2iza fi 2ichya b2oula mazbouta yi3neh ma32ouL hay L jimlé tkoun mazbouta mimma you2addé 2ila kawnha mich mazbouta! eh rkhiiLé L manti2 3a janab w diira gharaa2iziyyé la7ztein btin7aLL ma3ak.

Tab3an hay L mou3dilé 2ilha 7aLL manti2é bass ana kill chi b2oulo 2art 7aké w kizb!

3ashra biL 2iid wala ba2ra 3aLa L chajra

2ija Moustafa Kamal Ataturk 3ind L Li77am la yichtré ba2ra. W 2ija 3ind L Li77am ma ra7 3a Mazra3a, faaa baddo yéha masloukha w mcha2fé liL ba2ra. Ok, L ba2ra bi Tirkiyya, chaghlita tindaba7, fa bitsiir mitL 2inno, 3érfé 2addé badda touja3, w yimkin 3érfé 2inno badda tmout bass khayyé L ba2ra, ma 3inda ghariizt L bakaa2. 2illa 2inno, L ba2ar kama L marda biL mistachfayét btikhtilif atbaa3oun. Ka mariid byijo taychikkouk 2ibré, w inta bta3rif 2inno chaghltak, tinchak 2ibar, ma marid inta zét L chi mitL ma L ba2ra chaghlita tindaba7 li2anna ba2ra.Min bayn L atbaa3, Fi 3élam ékhir hammoun, hinné bichikko 2ibar 3azzaha2 baddak t2ouL, ma byouja3o, ma bikhaafo, 3aadé. Bass 2inno 2akalliyyé mitL L ba2ar L kamikaziyyé. Fi 3indak L aghlabiyyé L sé72a hinné L 3aalam li bya3rfo 2inno ra7 youja3o, bass pragmatiyyé L jamé3a w bya3rfo kamén 2inno chaghlitoun yinchakko 2ibar zét L chi mitL L ba2ar li bya3rfo 2inno haL chi bi dorroun, bass bi7élit Tirkiyya bi2oulo L fét7a w bisallo 3annabé. W fi 3indak L 2akalliyyé L tényé li mich raadyé biL 2adar wala bitchik 2ibar 3azzaha2: Hawdé bi panko 3a manzar L 2ibré, zét L chi fi ba2ar bi panko 3a manzar L satour, byirkdo w binotto 3a 2a2rab chajra. Ta3a raadiya la tinzaL 3anL chajra, kiss ikhta ba2ra, 7ada binazziL ba2ra 3anL chajra? W Fi 3indak Ataturk bi jaybto 3achr Liraat w raayi7 3ind L Li77am waasikon min nafsihi moudrikon tariikahou. Wa 2iz byoussaL la 3and L Li77am bi2illo baddé na22é ba2ra la tidba7lé yeha. Byottalla3 fi L Li77am byimsa7 L sikkin Lb2iido bi7ott 2iido 3a timmo w byis3ouL sa3lé néchfé w bi2ouL: 3aaL bass ma 3indeh ghayra haydé, hay L wa7iideh L bé2yé, w byibroum rasso bibot2 chadiid w byittalla3 biL ba2ra L wé2fé wara, barmé kénit 3am tfakkir bchi téné, ma 2aaryito la Ataturk waLa 2aaryé L Li77am. Fa hone Ataturk byiftouL chwérbo w bi7ott 3waynéto L mdawriine w byittalla3 fiya, bidiLL b2osba3o w bi2ouL hay hiyyé. Bit2oum btiltifit L ba2ra w bit3allé 7éjiba L yamiine hék. Bi2illo L Li77am la Ataturk houwwé w 3am bichiiL L 3achr Liraat min jaybto Tikram 3aynak kaa2idna ma bissir 2illa 3a khaatrak w byil2at L saatour bi2ido L yamiine w byibroum jismo la maylit L chméL w hoone, L ba2ra bitpannik. Tol3it haydé min hooLé L bipanko, rakadit rakadit w nattit 3aL chajra. 3aLLa ktéfo w 7wéjbo L Li77am w 2allo chou L 3amaL kaa2idna. Ttalla3 fi Ataturk w 2allo: bassita sadii2é, 3achra biL 2iid waLa ba2ra 3aLa L chajra. W min hone 2ija L mataL L cha3bé w ba3dein akid t7arraf w tghayyar.